Javoblar 2.0, moslashuvchan havolalar sozlamalari, ism ranglari va boshqalar

Asl eʼlonni ingliz tilida oʻqish

Bugungi yangilanishda foydalanuvchilarda xabarlarga belgilangan matndan iqtibos olish orqali javob berish, javoblarni boshqa chatlarga yuborish, istalgan matnni iqtibos kabi formatlash, havolalarga razm solishni sozlash, hisobingiz uchun rang tanlash va boshqalar paydo boʻldi.

Javoblar 2.0

2015-yilda Telegram foydalanuvchilarga uzun suhbatlarda oson harakatlanish imkonini bergan yangi format — xabarlarga javoblarni taqdim etgan edi. Vaqt oʻtishi bilan ushbu format barcha messenjerlar uchun oltin standartga aylandi — lekin bugun biz yangi darajaga oʻtmoqdamiz.

Endi foydalanuvchilar xabarning istalgan qismiga faqat undan iqtibos olish orqali javob berishi mumkin. Suhbatdosh asl xabarga oʻtish uchun bunday iqtibosni bosganida yangi animatsiya tufayli u darhol ushbu xabarni koʻradi.

Xabar qismidan iqtibos olish uchun xabarni bosing (iOS qurilmada xabarni bosib turing), kerakli matnni belgilang va “Iqtibos olish” bandini tanlang.

Bugundan boshlab javoblarni boshqa chatlarga ham yuborish mumkin, masalan, agar kimgadir shaxsan javob berishni yoki muhokamani boshqa guruh yoki kanalga koʻchirishni xohlasangiz. Iqtibos olingan matn bosilganida asl xabar u joylangan guruhda ochiladi, agar foydalanuvchida unga ruxsat boʻlsa.

Boshqa chatda javob berish uchun kiritish maydoni yuqorisidagi javob berish panelini bosing, “Boshqa chatda javob berish” bandini belgilang, keyin qayerga yubormoqchiligingizni tanlang.

Iqtiboslarni formatlash

Boshqalardan bevosita iqtibos olishdan tashqari, siz istalgan matnga, jumladan, bitta javobdagi bir nechta iqtibosga iqtibos formatlashini qoʻshishingiz mumkin.

Biz formatlash parametrlariga kirishni osonlashtirish uchun kontekst menyusini ham yaxshiladik.

Havolalar sozlamalari

2015-yilda Telegram sahifa sarlavhasi, tavsifi va mediasini aks ettiruvchi batafsil havolaga razm solish imkoniyatini qoʻshgan birinchi xabarlashuv ilovasi boʻlgan edi.

Endi foydalanuvchilar istalgan xabardagi havolalar koʻrinishini sozlashi mumkin: siz media oʻlchamini oʻzgartirishingiz, razm solish xabaringiz ostida yoki yuqorisida chiqishini tanlashingiz va agar bir nechta havola boʻlsa, qaysi havolaga razm solishni tanlashingiz mumkin.

Havolalarni ochish osonlashdi, chunki endi razm solish sohasining istalgan qismini bosishingiz mumkin.

Javob berish, uzatish va havola sozlamalari

Koʻplab yangi funksiyalardan foydalanish qulay boʻlishi uchun biz ular uchun kontekst menyusini qoʻshdik — ushbu menyu xabarlarga javob berayotganingizda, ularni uzatayotganingizda va havolalar qoʻshayotganingizda yoki bularning hammasini bir vaqtda bajarayotganingizda chiqadi.

Hisob ranglari

Telegram Premium bilan hisobingizni u uchun rang yoki ranglar kombinatsiyasini tanlash orqali har qachongidan ham koʻproq moslashtirishingiz mumkin.

Bunda ismingiz rangi barcha guruhlarda, siz yuboradigan havolalarda, shuningdek, xabarlaringizga javoblarda oʻzgaradi.

Shu bilan birga, naqsh sifatida ishlatiladigan emoji tanlashingiz ham mumkin. U boshqalar sizdan iqtibos olganida yoki sizga javob berganida xabarlaringiz ortida unikal fon yaratadi.

Android qurilmada hisob rangini sozlash uchun Sozlamalar > Chat sozlamalari > Ism rangini oʻzgartirish rukniga kiring. iOS qurilmada Sozlamalar > Koʻrinish > Ismingiz rangi rukniga kiring.

Bu sozlamalar obunachilardan yetarli ovozlar yigʻib, kamida 5-darajaga yetgan kanallar ham foydalana oladi.

Hikoyalarning yangi imkoniyatlari

Hikoyalar endi sizga videolarni oldinga va orqaga tez oʻtkazish imkonini ham beradi — shunchaki ekranni bosib turing va keyin oʻngga yoki chapga suring.

Yaxshiroq, yorqinroq selfilar olish maqsadida iliqlik va intensivlik uchun moslashuvchan sozlamalar bilan old chaqnoqdan foydalanishingiz mumkin.